ନୂଆଦିଲ୍ଲୀ: ସରକାରଙ୍କ କଡ଼ା ପଦକ୍ଷେପ ପରେ ଦେଶରେ ଚିନି ଦରରେ ହ୍ରାସ ଆରମ୍ଭ ହୋଇଛି। ଆମଦାନୀକୁ ଅନୁମତି, ଷ୍ଟକ୍ ସୀମା ଲାଗୁ ଓ ଜମାଖୋରଙ୍କ ବିରୋଧରେ ଚଢ଼ାଉ ପରେ ଚିନିର ଏକ୍ସ-ମିଲ୍ ଦର ପ୍ରାୟ ୧୮% କମିଛି। କିଛି ଦିନ ପୂର୍ବରୁ କିଲୋପ୍ରତି ୬୭ ଟଙ୍କା ଥିବା ଚିନି ଏବେ ୫୫ ଟଙ୍କାକୁ ଖସିଛି। ଆଗାମୀ ଦିନରେ ଏହି ଦର ଆହୁରି କମିବ ବୋଲି ଖାଦ୍ୟ ସଚିବ ସଞ୍ଜୀବ ଚୋପ୍ରା କହିଛନ୍ତି।
ସରକାରଙ୍କ ଅନୁସାରେ, ବଜାରରେ ଚିନି ଯୋଗାଣ ବଢ଼ାଇବା ପାଇଁ ୧୦ ଲକ୍ଷ ଟନ୍ ରିଫାଇନ୍ ହୋଇନଥିବା ଚିନି ଆମଦାନୀକୁ ଅନୁମତି ଦିଆଯାଇଛି। ଏହା ସହ ବଡ଼ କ୍ରେତାଙ୍କ ପାଇଁ ଷ୍ଟକ୍ ସୀମା ଧାର୍ଯ୍ୟ କରାଯାଇଛି। ଜମାଖୋରୀ ଓ କଳାବଜାରୀ ରୋକିବାକୁ ରାଜ୍ୟଗୁଡ଼ିକୁ ମଧ୍ୟ ନିର୍ଦ୍ଦେଶ ଦିଆଯାଇଛି।
ନ୍ୟାସନାଲ ଫେଡେରେସନ୍ ଅଫ୍ କୋଅପରେଟିଭ୍ ସୁଗାର ଫ୍ୟାକ୍ଟ୍ରିଜ୍ର ପ୍ରବନ୍ଧ ନିର୍ଦ୍ଦେଶକ ପ୍ରକାଶ ନାଇକନାୱରେଙ୍କ ଅନୁସାରେ, ଏକ୍ସ-ମିଲ୍ ଦର ଓ ପାଇକାରୀ ଦର ମଧ୍ୟରେ କିଲୋପ୍ରତି ପ୍ରାୟ ୨ରୁ ୩ ଟଙ୍କା ଏବଂ ଏକ୍ସ-ମିଲ୍ ଓ ଖୁଚୁରା ଦର ମଧ୍ୟରେ ୭ରୁ ୮ ଟଙ୍କା ତଫାତ ରହିଥାଏ। ତେଣୁ ମିଲ୍ ସ୍ତରରେ ଦର କମିଥିଲେ ମଧ୍ୟ ଏହାର ପୂରା ଲାଭ ଏପର୍ଯ୍ୟନ୍ତ ଗ୍ରାହକଙ୍କ ପାଖରେ ପହଞ୍ଚିନାହିଁ।
ଉପଭୋକ୍ତା ବ୍ୟାପାର ମନ୍ତ୍ରଣାଳୟର ତଥ୍ୟ ଅନୁସାରେ, ଅଗଷ୍ଟ ୨୪ରେ ଦେଶରେ ଚିନିର ହାରାହାରି ପାଇକାରୀ ଦର କିଲୋପ୍ରତି ୫୮.୨୯ ଟଙ୍କା ଓ ଖୁଚୁରା ଦର ୬୩.୦୫ ଟଙ୍କା ଥିଲା। ତେବେ ମିଲ୍ ସ୍ତରରେ ଦର ହ୍ରାସ ପାଇଥିବାରୁ ଆଗାମୀ କିଛି ଦିନରେ ଖୁଚୁରା ବଜାରରେ ମଧ୍ୟ ଦର କମିବା ଆଶା କରାଯାଉଛି।
ଜମାଖୋରୀ ରୋକିବା ପାଇଁ ସାରା ଦେଶରେ ‘ଫ୍ଲାଇଂ ସ୍କ୍ୱାଡ୍’ ନିୟୋଜିତ ହୋଇଛି। ଏହି ଟିମ୍ଗୁଡ଼ିକ ବିଭିନ୍ନ ସ୍ଥାନରେ ନିୟମିତ ଯାଞ୍ଚ କରୁଛନ୍ତି। ମାସକୁ ୧୦ ମେଟ୍ରିକ୍ ଟନ୍ରୁ ଅଧିକ ଚିନି ବ୍ୟବସାୟ କରୁଥିବା ଡିଲରମାନେ ୧୫ ଦିନରୁ ଅଧିକ ଆବଶ୍ୟକତାର ଚିନି ମହଜୁଦ ରଖିପାରିବେ ନାହିଁ।
ଏହାସହ ଚିନି ଆମଦାନୀକୁ ଟିକସମୁକ୍ତ କରାଯାଇଛି ଏବଂ ୩୦ ସେପ୍ଟେମ୍ବର ୨୦୨୬ ପର୍ଯ୍ୟନ୍ତ ଚିନି ରପ୍ତାନି ଉପରେ ରୋକ ଲଗାଯାଇଛି। ଡିଲରମାନଙ୍କ ପାଇଁ ୩୦ ନଭେମ୍ବର ପର୍ଯ୍ୟନ୍ତ ୪୦୦ ଟନ୍ ଷ୍ଟକ୍ ସୀମା ମଧ୍ୟ ଧାର୍ଯ୍ୟ କରାଯାଇଛି। ଏହି ସମସ୍ତ ପଦକ୍ଷେପ ଯୋଗୁଁ ଆଗାମୀ ଦିନରେ ଚିନି ଦର ଆହୁରି ହ୍ରାସ ପାଇବା ସମ୍ଭାବନା ରହିଛି।
