ଭୁବନେଶ୍ୱର, ୨୪।୧୦ : ବଙ୍ଗୋପସାଗରରେ ଘନୀଭୂତ ହେଉଛି ଲଘୁଚାପ। ଆଗକୁ ଏହା ବାତ୍ୟାର ରୂପ ନେବା ନେଇ ଆକଳନ କରାଯାଉଥିବାରୁ ଓଡ଼ିଶା ଓ ଆନ୍ଧ୍ରପ୍ରଦେଶ ଉପକୂଳରେ ଚିନ୍ତା ବଢ଼ିଛି। ସମ୍ଭାବ୍ୟ ବାତ୍ୟାର ପ୍ରଭାବରେ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ହୋଇପାରେ। ଅକ୍ଟୋବର ୨୮ ତାରିଖରେ ଏହା ସ୍ଥଳଭାଗ ଛୁଇଁବା ନେଇ ପୂର୍ବାନୁମାନ କରାଯାଉଛି।
୨୬ରେ ବାତ୍ୟା ରୂପ ନେବା ସମ୍ଭାବନା
ବଙ୍ଗୋପସାଗରରେ ସୃଷ୍ଟ ସ୍ପଷ୍ଟଚିହ୍ନିତ ଲଘୁଚାପ ଆସନ୍ତାକାଲି ଗଭୀର ଅବପାତରେ ପରିଣତ ହୋଇପାରେ। ଏହା ପରେ ଅକ୍ଟୋବର ୨୬ ତାରିଖରେ ବାତ୍ୟାର ରୂପ ନେବା ନେଇ ଆକଳନ କରାଯାଉଛି। ତେବେ ବାତ୍ୟାର ତୀବ୍ରତା ଏବଂ ଏହାର ଗତିପଥ ସମ୍ପର୍କରେ ଅଧିକ ସ୍ପଷ୍ଟତା ମିଳିବା ପରେ ସ୍ଥିତି ଜଣାପଡ଼ିବ।
ସମ୍ଭାବ୍ୟ ବାତ୍ୟା ଉତ୍ତର ଆନ୍ଧ୍ରପ୍ରଦେଶ ଓ ଦକ୍ଷିଣ ଓଡ଼ିଶା ଉପକୂଳ ଆଡ଼କୁ ମୁହାଁଇପାରେ। ଅକ୍ଟୋବର ୨୮ ତାରିଖରେ ସ୍ଥଳଭାଗ ଛୁଇଁବାର ଆଶଙ୍କା ରହିଛି। ତେବେ କେଉଁ ସ୍ଥାନରେ ଏହା ଲ୍ୟାଣ୍ଡଫଲ୍ କରିବ, ତାହା ଏବେଠାରୁ ନିଶ୍ଚିତ ହୋଇନାହିଁ।
୨୭ରୁ ବଢ଼ିବ ବର୍ଷା
ସମ୍ଭାବ୍ୟ ବାତ୍ୟାର ପ୍ରଭାବରେ ଅକ୍ଟୋବର ୨୭ ତାରିଖରୁ ଓଡ଼ିଶାରେ ବର୍ଷାର ପରିମାଣ ବଢ଼ିପାରେ। ବିଶେଷକରି ଦକ୍ଷିଣ ଓଡ଼ିଶାରେ ୨୭ରୁ ୨୯ ତାରିଖ ମଧ୍ୟରେ ଅଧିକ ବର୍ଷା ହେବାର ସମ୍ଭାବନା ରହିଛି। ଏହି ସମୟରେ ଉପକୂଳବର୍ତ୍ତୀ ଅଞ୍ଚଳର ପାଣିପାଗ ଉପରେ ମଧ୍ୟ ନଜର ରଖାଯାଉଛି।
ବାତ୍ୟା ସୃଷ୍ଟି ହେବା ପରେ ଏହାର ଗତିପଥ, ତୀବ୍ରତା ଏବଂ ସମ୍ଭାବ୍ୟ ଲ୍ୟାଣ୍ଡଫଲ୍ ସ୍ଥାନ ସମ୍ପର୍କରେ ଅଧିକ ସ୍ପଷ୍ଟ ଚିତ୍ର ମିଳିପାରିବ।
ଲ୍ୟାଣ୍ଡଫଲ୍ ପରେ କେଉଁ ଆଡ଼କୁ ଯିବ ବାତ୍ୟା?
ପୂର୍ବାନୁମାନ ଅନୁସାରେ, ସ୍ଥଳଭାଗ ଛୁଇଁବା ପରେ ସମ୍ଭାବ୍ୟ ବାତ୍ୟା ଛତିଶଗଡ଼ ଓ ଝାଡ଼ଖଣ୍ଡ ଆଡ଼କୁ ଗତି କରିପାରେ। ତେବେ ଏହାର ପ୍ରକୃତ ଗତିପଥ ଓ ସ୍ଥଳଭାଗରେ ପ୍ରବେଶ କରିବା ସ୍ଥାନ ନେଇ ପରବର୍ତ୍ତୀ ପାଣିପାଗ ଆକଳନ ଗୁରୁତ୍ୱପୂର୍ଣ୍ଣ ହେବ।
ଅକ୍ଟୋବର ମାସରେ ବଙ୍ଗୋପସାଗରରେ ବାତ୍ୟା ସୃଷ୍ଟି ହେବାର ଅନୁକୂଳ ପରିସ୍ଥିତି ରହିଥାଏ। ସମୁଦ୍ରର ଉପରିଭାଗର ତାପମାତ୍ରା ଏବଂ ବାୟୁମଣ୍ଡଳର ସ୍ଥିତି ବାତ୍ୟାର ତୀବ୍ରତାକୁ ପ୍ରଭାବିତ କରିଥାଏ।
ତେବେ ସମ୍ଭାବ୍ୟ ବାତ୍ୟାର ତୀବ୍ରତା, ପବନର ବେଗ ଓ ଗତିପଥ ସମ୍ପର୍କରେ ଅଧିକ ସୂଚନା ପାଇଁ ପାଣିପାଗ ବିଭାଗର ପରବର୍ତ୍ତୀ ବୁଲେଟିନ୍କୁ ଅପେକ୍ଷା କରାଯାଇଛି।
