ନୂଆଦିଲ୍ଲୀ, ୦୫/୧୦: ପରମାଣୁ ଅସ୍ତ୍ର ପ୍ରଥମେ ବ୍ୟବହାର ନକରିବା ନୀତି ବଜାୟ ରଖିଥିଲେ ମଧ୍ୟ ଭାରତ ନିଜର ପରମାଣୁ ଅସ୍ତ୍ର ବହନ ଓ ପ୍ରୟୋଗ କରିପାରୁଥିବା ସାମରିକ ବ୍ୟବସ୍ଥାର ଆଧୁନିକୀକରଣ ଜାରି ରଖିଛି। ‘ବୁଲେଟିନ୍ ଅଫ୍ ଦ ଆଟମିକ୍ ସାଇଣ୍ଟିଷ୍ଟ’ର ଏକ ରିପୋର୍ଟରେ ଏଭଳି ଆକଳନ କରାଯାଇଛି।
ରିପୋର୍ଟ ଅନୁସାରେ, ବିଦେଶୀ ବୈଜ୍ଞାନିକଙ୍କ ଆକଳନରେ ଭାରତର ପରମାଣୁ ଅସ୍ତ୍ର ଭଣ୍ଡାରରେ ପ୍ରାୟ ୧୯୦ଟି ୱାରହେଡ୍ ଥାଇପାରେ। ତେବେ ଭାରତ ଏ ସମ୍ପର୍କିତ ସଠିକ୍ ତଥ୍ୟ ସାର୍ବଜନୀନ କରୁନଥିବାରୁ ପ୍ରକୃତ ସଂଖ୍ୟା ନିର୍ଦ୍ଧାରଣ କରିବା କଷ୍ଟକର ବୋଲି ରିପୋର୍ଟରେ ଉଲ୍ଲେଖ ରହିଛି।
ପରମାଣୁ ଅସ୍ତ୍ର ପ୍ରୟୋଗ ପାଇଁ ଭାରତ ବିଭିନ୍ନ ପ୍ରକାରର ବିମାନ, ଭୂମିଭିତ୍ତିକ କ୍ଷେପଣାସ୍ତ୍ର ଓ ସମୁଦ୍ରଭିତ୍ତିକ ପ୍ରଣାଳୀକୁ ବିକଶିତ କରୁଛି। ଏହି ତିନୋଟି ମାଧ୍ୟମକୁ ନେଇ ଭାରତର ଆକ୍ରମଣ କ୍ଷମତା ଅଧିକ ବ୍ୟାପକ ହେଉଥିବା ରିପୋର୍ଟରେ ଦାବି କରାଯାଇଛି।
ବର୍ତ୍ତମାନ ଭାରତୀୟ ବାୟୁସେନାରେ ପରମାଣୁ ଅସ୍ତ୍ର ବହନ କରିବାର କ୍ଷମତା ଥିବା ଦୁଇ ପ୍ରକାର ଲଢୁଆ ବିମାନ ରହିଥିବା ଆକଳନ କରାଯାଇଛି। ଏଥିରେ ଫ୍ରାନ୍ସରୁ ଆସିଥିବା ‘ମିରାଜ୍ ୨୦୦୦’ ଏବଂ ବ୍ରିଟେନ୍-ଫ୍ରାନ୍ସ ମିଳିତ ଭାବେ ବିକଶିତ ‘ଜାଗୁଆର’ ସାମିଲ ଅଛି।
ରିପୋର୍ଟ ଅନୁଯାୟୀ, ଭବିଷ୍ୟତରେ ପୁରୁଣା ଜାଗୁଆର ବିମାନଗୁଡ଼ିକ ସେବାରୁ ବାହାରିଲେ ଫ୍ରାନ୍ସ ନିର୍ମିତ ‘ରାଫେଲ’ ଯୁଦ୍ଧବିମାନ ଏହି ଭୂମିକାରେ ଆସିପାରେ। ଏହା ସହ ଭୂମି ଓ ସମୁଦ୍ରଭିତ୍ତିକ ପ୍ରଣାଳୀର ବିକାଶ ଭାରତର ପରମାଣୁ ତ୍ରିମୁଖୀ କ୍ଷମତାକୁ ଆହୁରି ସୁଦୃଢ଼ କରୁଥିବା ଆକଳନ କରାଯାଇଛି।
ତେବେ ଏସବୁ ଆକଳନ ସାର୍ବଜନୀନ ଭାବେ ଉପଲବ୍ଧ ତଥ୍ୟ ଓ ବିଶେଷଜ୍ଞମାନଙ୍କ ଅଧ୍ୟୟନ ଉପରେ ଆଧାରିତ। ଭାରତ ନିଜ ପରମାଣୁ ଭଣ୍ଡାର ସମ୍ପର୍କିତ ଅଧିକାଂଶ ତଥ୍ୟ ଗୋପନୀୟ ରଖୁଥିବାରୁ ଏହାର ସଠିକ୍ ଆକଳନ ସମ୍ଭବ ନୁହେଁ।
