ଭୋପାଳ : ଉତ୍ତର ପ୍ରଦେଶର ଝାଂସୀ ଜିଲ୍ଲାର ହରଦୌଲପୁର ମହଲ୍ଲାରେ ଘଟିଥିବା ଏକ ଦୁଃଖଦ ଘଟଣା ସ୍ଥାନୀୟ ଅଞ୍ଚଳରେ ଭୟ ଓ ଚର୍ଚ୍ଚାର ବିଷୟ ପାଲଟିଛି। ଯେଉଁ କୋଠରୀରେ ଦୁଇ ଦିନ ପୂର୍ବରୁ ଗୋଟିଏ ସାପକୁ ମାରିଦିଆଯାଇଥିଲା, ସେହି କୋଠରୀରେ ରାତିରେ ପଶି ଆଉ ଏକ ସାପ ଦୁଇ ନିରୀହ ଶିଶୁଙ୍କୁ କାମୁଡ଼ି ଦେଇଛି। ଏହି ଘଟଣାରେ ୭ ବର୍ଷର ମୟଙ୍କଙ୍କ ମୃତ୍ୟୁ ଘଟିଥିବାବେଳେ, ତାଙ୍କର ୫ ବର୍ଷର ଭଉଣୀ ପ୍ରଗତି ଗୁରୁତର ଅବସ୍ଥାରେ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି।
ପ୍ରଦୀପ କୁଶୱାହା ନାମକ ଜଣେ ଶ୍ରମିକଙ୍କ ପରିବାରରେ ଏହି ଅଘଟଣ ଘଟିଛି। ରବିବାର ରାତିରେ ସମସ୍ତେ ଭୋଜନ ସାରି ଶୋଇଥିବା ବେଳେ, ହଠାତ୍ ଦୁଇ ଶିଶୁଙ୍କ ଚିତ୍କାର ଶୁଣି ପରିବାର ଲୋକେ ଦୌଡ଼ି ଆସିଥିଲେ। ସେତେବେଳକୁ ସାପ ଉଭୟଙ୍କୁ କାମୁଡ଼ି ସାରିଥିଲା। ତୁରନ୍ତ ସେମାନଙ୍କୁ ମେଡିକାଲ କଲେଜକୁ ନିଆଯାଇଥିଲେ ମଧ୍ୟ ଡାକ୍ତର ୭ ବର୍ଷର ମୟଙ୍କଙ୍କୁ ମୃତ ଘୋଷଣା କରିଥିଲେ। ପ୍ରଗତିଙ୍କ ଚିକିତ୍ସା ଏବେ ବି ଜାରି ରହିଛି।
ଏହି ଘଟଣା ପରେ ଅଞ୍ଚଳରେ ବିଭିନ୍ନ ପ୍ରକାର ଚର୍ଚ୍ଚା ଆରମ୍ଭ ହୋଇଛି। କାରଣ ଦୁଇ ଦିନ ପୂର୍ବରୁ ସେହି କୋଠରୀରୁ ଏକ ସାପ ବାହାରିଥିବା ବେଳେ ସ୍ଥାନୀୟ ଲୋକେ ତାକୁ ମାରିଦେଇଥିଲେ। ତେଣୁ ଅନେକେ ଏହାକୁ “ନାଗ-ନାଗୁଣୀ”ର କାହାଣୀ ସହ ଯୋଡ଼ି ଦେଖୁଛନ୍ତି ଏବଂ ପ୍ରତିଶୋଧ ନେବା ପାଇଁ ନାଗୁଣୀ ଆକ୍ରମଣ କରିଥିବା କହୁଛନ୍ତି।
ତେବେ ଏଭଳି ଦାବିର କୌଣସି ବୈଜ୍ଞାନିକ ପ୍ରମାଣ ନାହିଁ। ସ୍ଥାନୀୟ କାଉନସିଲର ସୁଶୀଲ କୁମାର କୁଶୱାହା କହିଛନ୍ତି, ପୂର୍ବରୁ ସେହି କୋଠରୀରୁ ଏକ ସାପ ବାହାରିଥିଲା ଏବଂ ଗ୍ରାମବାସୀ ତାକୁ ମାରିଦେଇଥିଲେ। ଏବେ ପୁଣି ଅନ୍ୟ ଏକ ସାପ ମିଳିବା ପରେ ଲୋକଙ୍କ ମନରେ ବିଭିନ୍ନ ସନ୍ଦେହ ସୃଷ୍ଟି ହୋଇଛି।
ବନ ବିଭାଗ କିମ୍ବା କୌଣସି ସରକାରୀ ସଂସ୍ଥା ଏହି ଦୁଇଟି ସାପ ପରସ୍ପରର ଯୋଡ଼ି ବୋଲି ସ୍ପଷ୍ଟ କରିନାହାନ୍ତି। ସାପ ବିଶେଷଜ୍ଞମାନଙ୍କ ମତରେ ମଧ୍ୟ ସାପ ପ୍ରତିଶୋଧ ନେଇଥାଏ ବୋଲି କୁହାଯାଉଥିବା କଥାର କୌଣସି ବୈଜ୍ଞାନିକ ଆଧାର ନାହିଁ। ତଥାପି ଏହି ଦୁଃଖଦ ଘଟଣା ପରେ ସମଗ୍ର ଅଞ୍ଚଳରେ ଭୟର ପରିବେଶ ସୃଷ୍ଟି ହୋଇଛି।
