କଲମ୍ବୋ, ୨୫/୦୮: ଦ୍ୱିତୀୟ ଟେଷ୍ଟର ପ୍ରଥମ ଦିନରେ ପଡ଼ିଆରେ ଅସଂଯତ ଆଚରଣ ପାଇଁ ଭାରତୀୟ ଓପନର ଯଶସ୍ୱୀ ଜୈଶ୍ୱାଲ ଏବଂ ଶ୍ରୀଲଙ୍କାର ପେସ୍ ବୋଲର ଆସିଥା ଫର୍ଣ୍ଣାଣ୍ଡୋଙ୍କ ବିରୋଧରେ ନିଆଯାଇଛି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ। ଉଭୟଙ୍କ ମ୍ୟାଚ୍ ପାଉଣାରୁ ୨୫ ପ୍ରତିଶତ ଲେଖାଏଁ କାଟିବା ସହ ଗୋଟିଏ ଲେଖାଏଁ ଡିମେରିଟ୍ ପଏଣ୍ଟ ଯୋଡ଼ାଯାଇଛି।
ପ୍ରଥମ ଦିନ ଆସିଥାଙ୍କ ବଲରେ ଯଶସ୍ୱୀ ଆଉଟ୍ ହେବା ପରେ ଉଭୟଙ୍କ ମଧ୍ୟରେ ବିବାଦ ଦେଖାଦେଇଥିଲା। ପାଭିଲିୟନ ଫେରୁଥିବା ବେଳେ ଆସିଥା କିଛି କହିବାରୁ ଯଶସ୍ୱୀ ତାଙ୍କ ଆଡ଼କୁ ଆଗେଇ ଯାଇଥିଲେ। ଏହାପରେ ଆସିଥା ମଧ୍ୟ ତାଙ୍କ ନିକଟକୁ ଆସିଥିଲେ। ଏପରିକି ଯଶସ୍ୱୀଙ୍କ ହେଲମେଟ୍ ଆସିଥାଙ୍କ ଶରୀରରେ ଧକ୍କା ହୋଇଥିବା ଭିଡିଓରେ ଦେଖାଯାଇଥିଲା।
ଭିଡିଓ ଫୁଟେଜ୍ ଯାଞ୍ଚ ପରେ ମ୍ୟାଚ୍ ରେଫରୀ ଉଭୟଙ୍କୁ ଦୋଷୀ ପାଇଥିଲେ। ICC ଆଚାର ସଂହିତାର ୨.୧୨ ଧାରା ଉଲ୍ଲଂଘନ କରିଥିବାରୁ ଏହି ଦଣ୍ଡ ଦିଆଯାଇଛି। ଉଲ୍ଲେଖଯୋଗ୍ୟ, ଯଶସ୍ୱୀ ପ୍ରଥମ ଇନିଂସରେ ୪୫ ରନ୍ କରିଥିବା ବେଳେ ଆସିଥା ୪ଟି ୱିକେଟ୍ ନେଇଥିଲେ।
