ମୁମ୍ବାଇ: ‘କଣ୍ଟ୍ରୋଲ… କଣ୍ଟ୍ରୋଲ…’—ଏହି ଡାଏଲଗ୍ ଶୁଣିଲେ ଆଜି ବି ମନେ ପଡ଼ିଯାଆନ୍ତି ବଲିଉଡର ଦିଗ୍ଗଜ ଅଭିନେତା ନାନା ପାଟେକର। ‘ୱେଲକମ୍’ର ଉଦୟ ଭାଇ ଭାବେ ଦର୍ଶକଙ୍କୁ ହସାଇଥିବା ଏହି ଭେଟେରାନ୍ ଅଭିନେତା ଆଉ ନାହାନ୍ତି। ୭୫ ବର୍ଷ ବୟସରେ ତାଙ୍କ ପରଲୋକ ହୋଇଥିବା ଖବର ସିନେମା ଜଗତରେ ଶୋକର ଛାୟା ଖେଳାଇଛି।
ନାନା ପାଟେକର ହିନ୍ଦୀ ସହ ମରାଠୀ ସିନେମାରେ ନିଜର ଅଭିନୟର ଏକ ସ୍ୱତନ୍ତ୍ର ଛାପ ଛାଡ଼ିଥିଲେ। ତାଙ୍କର ଦମଦାର ଡାଏଲଗ୍ ଡେଲିଭରି, ଭିନ୍ନ ଅଭିନୟ ଶୈଳୀ ଏବଂ ଚରିତ୍ରକୁ ନିଜ ଢଙ୍ଗରେ ଜୀବନ୍ତ କରିବାର କ୍ଷମତା ତାଙ୍କୁ ଅନ୍ୟ ଅଭିନେତାଙ୍କଠାରୁ ଅଲଗା ପରିଚୟ ଦେଇଥିଲା।
‘ପରିନ୍ଦା’, ‘କ୍ରାନ୍ତିବୀର’, ‘ଅବ୍ ତକ୍ ଛପ୍ପନ’, ‘ୟଶୱନ୍ତ’, ‘ୱେଲକମ୍’ ଏବଂ ‘ନଟସମ୍ରାଟ’ ଭଳି ଫିଲ୍ମରେ ତାଙ୍କର ଅଭିନୟ ଦର୍ଶକଙ୍କ ମନରେ ଆଜି ବି ରହିଛି। ଗମ୍ଭୀର ଚରିତ୍ର ହେଉ କିମ୍ବା କମେଡି—ପ୍ରତ୍ୟେକ ଭୂମିକାକୁ ନିଜ ଅଭିନୟରେ ସ୍ମରଣୀୟ କରିପାରୁଥିଲେ ନାନା।
‘ଗମନ’ରୁ ଆରମ୍ଭ ହୋଇଥିଲା ଯାତ୍ରା
୧ ଜାନୁଆରୀ ୧୯୫୧ରେ ମହାରାଷ୍ଟ୍ରରେ ଜନ୍ମ ହୋଇଥିଲେ ନାନା ପାଟେକର। ତାଙ୍କର ପ୍ରକୃତ ନାମ ବିଶ୍ୱନାଥ ପାଟେକର। ୧୯୭୮ରେ ‘ଗମନ’ ଫିଲ୍ମରୁ ଆରମ୍ଭ ହୋଇଥିଲା ତାଙ୍କର ସିନେମା ଯାତ୍ରା। ଏହା ପରେ ଧୀରେ ଧୀରେ ନିଜ ଅଭିନୟ ପ୍ରତିଭା ବଳରେ ସେ ବଲିଉଡରେ ଏକ ବିଶିଷ୍ଟ ସ୍ଥାନ ହାସଲ କରିଥିଲେ।
କେବଳ ଅଭିନୟ ନୁହେଁ, ସାମାଜିକ କାର୍ଯ୍ୟ ଏବଂ ଭାରତୀୟ ସେନା ପ୍ରତି ତାଙ୍କର ସମ୍ମାନ ମଧ୍ୟ ତାଙ୍କୁ ସ୍ୱତନ୍ତ୍ର ପରିଚୟ ଦେଇଥିଲା। ଅଭିନେତା ସହ ସେ ନିର୍ଦ୍ଦେଶକ ଭାବେ ମଧ୍ୟ କାମ କରିଥିଲେ।
ତାଙ୍କ ନିର୍ଦ୍ଦେଶିତ ‘ପ୍ରହାର: ଦ ଫାଇନାଲ ଆଟାକ୍’ ଥିଲା ପ୍ରଥମ ଫିଲ୍ମ। ସେନା ଜୀବନ, ଶୃଙ୍ଖଳା ଏବଂ ସୈନିକଙ୍କ ସଂଘର୍ଷକୁ ଏହି ଚଳଚ୍ଚିତ୍ରରେ ଦେଖାଇଥିଲେ ସେ।
ଜାତୀୟ ପୁରସ୍କାରରୁ ପଦ୍ମଶ୍ରୀ
ନାନା ପାଟେକରଙ୍କ ଅଭିନୟ ପ୍ରତିଭାକୁ ଜାତୀୟ ସ୍ତରରେ ମଧ୍ୟ ମିଳିଥିଲା ସ୍ୱୀକୃତି। ‘କ୍ରାନ୍ତିବୀର’ ପାଇଁ ସେ ଶ୍ରେଷ୍ଠ ଅଭିନେତା ଏବଂ ‘ଅଗ୍ନି ସାକ୍ଷୀ’ ପାଇଁ ଶ୍ରେଷ୍ଠ ସହ-ଅଭିନେତା ଭାବେ ଜାତୀୟ ଚଳଚ୍ଚିତ୍ର ପୁରସ୍କାର ପାଇଥିଲେ। ତାଙ୍କ ଦୀର୍ଘ କଳା ଯାତ୍ରା ଏବଂ ଅବଦାନ ପାଇଁ ୨୦୧୩ରେ ଭାରତ ସରକାର ତାଙ୍କୁ ପଦ୍ମଶ୍ରୀରେ ସମ୍ମାନିତ କରିଥିଲେ।
ନାନା ପାଟେକରଙ୍କ ବିୟୋଗ ଭାରତୀୟ ସିନେମା ପାଇଁ ଏକ ବଡ଼ କ୍ଷତି। ଦଶନ୍ଧି ଦଶନ୍ଧି ଧରି ନିଜ ଅଭିନୟରେ ଦର୍ଶକଙ୍କୁ ପ୍ରଭାବିତ କରିଥିବା ଏହି ଦିଗ୍ଗଜ ଅଭିନେତା ତାଙ୍କ ଚରିତ୍ର, ଡାଏଲଗ୍ ଏବଂ ଅଭିନୟ ପାଇଁ ସବୁବେଳେ ଦର୍ଶକଙ୍କ ମନରେ ଜୀବିତ ରହିବେ।
