ବର୍ଷାରେ ଘର ଭାଙ୍ଗିଛି କି ? ସରକାର ଦେବେ ନୂଆ ଘର ! ସାମାନ୍ୟ ଭାଙ୍ଗିଥିଲେ ମିଳିବ ଟଙ୍କା

ଭୁବନେଶ୍ୱର: ଓଡ଼ିଶାରେ ଲଗାଣ ବର୍ଷା ଯୋଗୁଁ ବିଭିନ୍ନ ଜିଲ୍ଲାରେ ଜନଜୀବନ ପ୍ରଭାବିତ ହୋଇଛି । କେଉଁଠି ଘର ଭାଙ୍ଗିଛି ତ ଆଉ କେଉଁଠି ଫସଲ ନଷ୍ଟ ହୋଇଛି । ପାହାଡ଼ିଆ ଅଞ୍ଚଳରେ ଭୂସ୍ଖଳନ ଯୋଗୁଁ ମଧ୍ୟ ସମସ୍ୟା ଦେଖାଦେଇଛି । ଏଭଳି ସ୍ଥିତିରେ ବର୍ଷାଜନିତ କ୍ଷୟକ୍ଷତିର ଶୀଘ୍ର ଆକଳନ କରି ପ୍ରଭାବିତ ପରିବାରକୁ ସହାୟତା ଦେବାକୁ ରାଜ୍ୟ ସରକାର ପଦକ୍ଷେପ ନେଇଛନ୍ତି ।

ବର୍ଷା ଯୋଗୁଁ ଯେଉଁ ପରିବାରର ଘର ଭାଙ୍ଗିଛି, ସେମାନଙ୍କୁ ସରକାରୀ ଆବାସ ଯୋଜନାରେ ନୂଆ ଘର ଯୋଗାଇ ଦିଆଯିବ ବୋଲି ପଞ୍ଚାୟତିରାଜ ମନ୍ତ୍ରୀ ରବି ନାଏକ ଶୁକ୍ରବାର ସୂଚନା ଦେଇଛନ୍ତି ।

ଅନ୍ତଦ୍ୱୟ ଗୃହ ଯୋଜନାରେ ମିଳିବ ନୂଆ ଘର

ମନ୍ତ୍ରୀଙ୍କ ସୂଚନା ଅନୁସାରେ, ଗତ ୪ ଦିନର ବର୍ଷାରେ ରାଜ୍ୟର ୪ଟି ଜିଲ୍ଲାରେ ପ୍ରାୟ ୪୫ରୁ ୫୦ଟି ଘର ସମ୍ପୂର୍ଣ୍ଣ କିମ୍ବା ଆଂଶିକ ଭାବେ କ୍ଷତିଗ୍ରସ୍ତ ହୋଇଛି । ଏହି ପରିବାରଗୁଡ଼ିକୁ ‘ଅନ୍ତଦ୍ୱୟ ଗୃହ ଯୋଜନା’ ଅଧୀନରେ ନୂଆ ଆବାସ ଦେବାକୁ ପ୍ରକ୍ରିୟା ଆରମ୍ଭ ହେବ ।

ବର୍ଷା କମିବା ପରେ ଅଧିକାରୀମାନେ କ୍ଷୟକ୍ଷତିର ଚୂଡ଼ାନ୍ତ ଆକଳନ କରିବେ । ଏଥିପାଇଁ ସର୍ବାଧିକ ୫ ଦିନ ମଧ୍ୟରେ ରିପୋର୍ଟ ପ୍ରସ୍ତୁତ କରିବାକୁ ପ୍ରଶାସନକୁ ନିର୍ଦ୍ଦେଶ ଦିଆଯାଇଛି ।

୬ ପଞ୍ଚାୟତରେ ବନ୍ୟା ପ୍ରଭାବ

ଇନ୍ଦ୍ରାବତୀ ନଦୀର ଜଳସ୍ତର ବଢ଼ିବା ଫଳରେ ୬ଟି ପଞ୍ଚାୟତର ଲୋକେ ପ୍ରଭାବିତ ହୋଇଛନ୍ତି । ପ୍ରଭାବିତ ଲୋକଙ୍କୁ ଅସ୍ଥାୟୀ ଆଶ୍ରୟସ୍ଥଳୀରେ ରଖିବା ସହ ଖାଦ୍ୟ ଓ ଆବଶ୍ୟକ ସାମଗ୍ରୀ ଯୋଗାଇ ଦିଆଯାଉଛି । ଶୁଖିଲା ରାସନ ଓ କମ୍ବଳ ମଧ୍ୟ ବଣ୍ଟନ କରାଯାଉଛି । ତେବେ ଇନ୍ଦ୍ରାବତୀ ନଦୀର ଜଳସ୍ତର ବର୍ତ୍ତମାନ ଧୀରେ ଧୀରେ କମୁଥିବା ସୂଚନା ମିଳିଛି ।

ନବରଙ୍ଗପୁରରେ ନଷ୍ଟ ହେଲା ମକା ଫସଲ

ନବରଙ୍ଗପୁର ଓ ଝରୀଗାଁ ଅଞ୍ଚଳରେ ବର୍ଷା ଓ ଜଳବନ୍ଦୀ ଯୋଗୁଁ ଅନେକ ଗାଁ ପ୍ରଭାବିତ ହୋଇଛି । ଦୀର୍ଘ ସମୟ ଧରି ପାଣି ଜମି ରହିବାରୁ ବ୍ୟାପକ ମକା ଫସଲ ନଷ୍ଟ ହୋଇଥିବା ଜଣାପଡ଼ିଛି । ଫସଲ କ୍ଷୟକ୍ଷତିର ଆକଳନ କରିବାକୁ କୃଷି ବିଭାଗକୁ ନିର୍ଦ୍ଦେଶ ଦିଆଯାଇଛି ।

ପାହାଡ଼ିଆ ଅଞ୍ଚଳରେ ଭୂସ୍ଖଳନ

ଲଗାଣ ବର୍ଷାର ପ୍ରଭାବରେ ପାହାଡ଼ିଆ ଜିଲ୍ଲାଗୁଡ଼ିକରେ ପ୍ରାୟ ୨୦ରୁ ୨୫ଟି ସ୍ଥାନରେ ଭୂସ୍ଖଳନ ଘଟିଥିବା ସୂଚନା ମିଳିଛି । ମାଲକାନଗିରିର ୬ଟି ପ୍ରମୁଖ ରାସ୍ତା ଉପରେ ବନ୍ୟାଜଳ ପ୍ରବାହିତ ହେଉଛି । ତେବେ ଏପର୍ଯ୍ୟନ୍ତ ସାଧାରଣ ଯୋଗାଯୋଗ ବ୍ୟବସ୍ଥା ବଡ଼ ଧରଣରେ ବାଧାପ୍ରାପ୍ତ ହୋଇନଥିବା ଜଣାପଡ଼ିଛି ।

ଗତ କିଛି ଦିନର ବର୍ଷା ରେକର୍ଡକୁ ଦେଖିଲେ, କୋରାପୁଟରେ ୨୬ ମିଲିମିଟର, ନବରଙ୍ଗପୁରରେ ୨୩ ମିଲିମିଟର ଏବଂ ମାଲକାନଗିରିରେ ୧୮ ମିଲିମିଟର ବର୍ଷା ରେକର୍ଡ ହୋଇଛି । ବର୍ଷାର ପରିମାଣ ଓ ପ୍ରଭାବ ଉପରେ ପ୍ରଶାସନ ନଜର ରଖିଥିବା ବେଳେ ପ୍ରଭାବିତ ପରିବାରଙ୍କୁ ଶୀଘ୍ର ସରକାରୀ ସହାୟତା ଯୋଗାଇବା ଉପରେ ଗୁରୁତ୍ୱ ଦିଆଯାଉଛି ।