ରାଜ୍ୟରେ ପ୍ରବଳ ବର୍ଷା ! ଅଧା ଓଡ଼ିଶା ଭାସିବ

ଭୁବନେଶ୍ୱର, ୧୧/୦୯: ଓଡ଼ିଶାରେ ଲଘୁଚାପଜନିତ ବର୍ଷା ଜାରି ରହିଛି। ଗତ ୨୪ ଘଣ୍ଟାରେ ରାଜ୍ୟର ଅନେକ ଅଞ୍ଚଳରେ ବର୍ଷା ହୋଇଥିବାବେଳେ ଶନିବାର ମଧ୍ୟ ବର୍ଷାର ପ୍ରଭାବ ରହିବ। ତେବେ ରବିବାରଠାରୁ ଧୀରେ ଧୀରେ ବର୍ଷା କମିବାର ସମ୍ଭାବନା ରହିଛି।

ପାଣିପାଗ ବିଭାଗର ସୂଚନା ଅନୁସାରେ, ଉତ୍ତର-ପଶ୍ଚିମ ବଙ୍ଗୋପସାଗର ଏବଂ ଏହାର ନିକଟବର୍ତ୍ତୀ ଦକ୍ଷିଣ ଓଡ଼ିଶା ଓ ଉତ୍ତର ଆନ୍ଧ୍ର ଉପକୂଳରେ ଲଘୁଚାପ ସକ୍ରିୟ ରହିଛି। ଆସନ୍ତା ୨୪ ଘଣ୍ଟାରେ ଏହା ଆହୁରି ଘନୀଭୂତ ହୋଇପାରେ। ଏହାର ପ୍ରଭାବରେ ଶନିବାର ସକାଳ ପର୍ଯ୍ୟନ୍ତ ରାଜ୍ୟର ଅଧିକାଂଶ ସ୍ଥାନରେ ବର୍ଷା ହେବାର ଆକଳନ କରାଯାଇଛି।

ଦକ୍ଷିଣ ଓଡ଼ିଶାରେ ଅଧିକ ବର୍ଷା ଆଶଙ୍କା

ନବରଙ୍ଗପୁର, କୋରାପୁଟ ଓ ମାଲକାନଗିରିରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ। ଏହାଛଡ଼ା ନୂଆପଡ଼ା, ବଲାଙ୍ଗିର ଓ କଳାହାଣ୍ଡିରେ ମଧ୍ୟ ପ୍ରବଳ ବର୍ଷାର ସମ୍ଭାବନା ରହିଛି।

ଦକ୍ଷିଣ ଓଡ଼ିଶା ସମେତ ଉତ୍ତର ଓ ଆଭ୍ୟନ୍ତରୀଣ ଓଡ଼ିଶାର ଅନେକ ସ୍ଥାନରେ ଘଡ଼ଘଡ଼ି ସହ ବର୍ଷା ହୋଇପାରେ। କେତେକ ଅଞ୍ଚଳରେ ପବନ ସହ ବର୍ଷା ହେବା ନେଇ ମଧ୍ୟ ଆଶଙ୍କା ରହିଛି।

ରବିବାରଠାରୁ ବଦଳିବ ପାଗ

ପୂର୍ବାନୁମାନ ଅନୁସାରେ, ରବିବାରଠାରୁ ରାଜ୍ୟରେ ବର୍ଷାର ପରିମାଣ ଯଥେଷ୍ଟ କମିପାରେ। ସୋମବାରଠାରୁ ବଡ଼ଧରଣର ବର୍ଷାର ସମ୍ଭାବନା ନଥିବାବେଳେ କେତେକ ସ୍ଥାନରେ ହାଲୁକାରୁ ମଧ୍ୟମ ବର୍ଷା ହୋଇପାରେ।

ଅନେକ ସ୍ଥାନରେ ରେକର୍ଡ ବର୍ଷା

ଗତ ୨୪ ଘଣ୍ଟା ମଧ୍ୟରେ ଦକ୍ଷିଣ ଓ ପଶ୍ଚିମ ଓଡ଼ିଶାର ବିଭିନ୍ନ ସ୍ଥାନରେ ଭଲ ବର୍ଷା ରେକର୍ଡ ହୋଇଛି। ଭବାନୀପାଟଣାରେ ୧୪୦ ମିମି, ମାଲକାନଗିରିରେ ୧୨୬.୬ ମିମି, ଟିଟିଲାଗଡ଼ରେ ୮୭.୨ ମିମି, ବାଲେଶ୍ୱରରେ ୬୫ ମିମି ଏବଂ ଛତ୍ରପୁରରେ ୬୫ ମିମି ବର୍ଷା ରେକର୍ଡ ହୋଇଛି।

ସେହିପରି ଚାନ୍ଦବାଲିରେ ୫୧.୨ ମିମି, ନୂଆପଡ଼ା ଓ ପାରଳାଖେମୁଣ୍ଡିରେ ୫୩ ମିମି, ଗୋପାଳପୁରରେ ୫୬ ମିମି ଏବଂ କେନ୍ଦ୍ରାପଡ଼ାରେ ୪୪ ମିମି ବର୍ଷା ହୋଇଛି। ଶୁକ୍ରବାର ସକାଳରୁ ସନ୍ଧ୍ୟା ମଧ୍ୟରେ ମାଲକାନଗିରିରେ ମଧ୍ୟ ୬୫ ମିମି ବର୍ଷା ରେକର୍ଡ ହୋଇଥିଲା।