ହିନ୍ଦୀ ସିନେମାର ମହାନାୟକ ଅମିତାଭ ବଚନ ଫ୍ୟାନ୍ସଙ୍କୁ ଚମକାଇବା ଭଳି ଖବର ସେୟାର କରିଛନ୍ତି । ଫିଲ୍ମ ପ୍ରୋଜେକ୍ଟ କେ ର ସୁଟିଂରେ ଆକ୍ସନ ସିନ୍ ବେଳେ ଗୁରୁତର ଭାବେ ଆହତର ଶିକାର ହୋଇଛନ୍ତି । ମଝି ପଞ୍ଜରାରେ ଆଘାତ ଲାଗିବାରୁ ନିଶ୍ବାସ ପ୍ରଶ୍ୱାସରେ ତାଙ୍କର ବାଧା ସୃଷ୍ଟି ହୋଇଛି । ଯେଉଁଥିପାଇଁ ସମସ୍ତ ସୁଟିଂ ବାତିଲ କରାଯାଇଥିବା ଜଣାପଡିଛି ।
ଏହି ଘଟଣା ଘଟିବା ପରେ ହସ୍ପିଟାଲରେ ତାଙ୍କୁ ତୁରନ୍ତ ଭର୍ତି କରାଯାଇଥିଲା । ଡାକ୍ତର ପରୀକ୍ଷା ନିରୀକ୍ଷା କରିବା ପରେ କିଛି ସପ୍ତାହ ଯାଏଁ ବିଶ୍ରାମ କରିବାକୁ ବିଗ ବି ଙ୍କୁ ପରାମର୍ଶ ଦେଇଛନ୍ତି । ଯେଉଁ ପର୍ଯ୍ୟନ୍ତ ସେ ସଂପୂର୍ଣ୍ଣ ଭାବେ ସୁସ୍ଥ ହୋଇନାହାନ୍ତି, ସେବେ ଯାଏଁ ତାଙ୍କର ସମସ୍ତ ପ୍ରୋଜେକ୍ଟ କ୍ୟାନସଲ କରାଯାଇଛି ।
ତେବେ ଦେଖିବାକୁ ଗଲେ 80 ବର୍ଷ ବୟସରେ ବି ଅମିତାଭ ବଚନ ସିନେମା ଜଗତରେ ପୁରା ଆକ୍ଟିଭ ଅଛନ୍ତି । ଏବେ ମଲ୍ଟିପଲ ପ୍ରୋଜେକ୍ଟରେ ଭାଗୀଦାର ବିଗ୍ ବି । ମାତ୍ର ହଠାତ ଏମିତି ଅଘଟଣର ଶିକାର ହେବା କାରଣରୁ ଅପକମିଂ ପ୍ରୋଜେକ୍ଟ ଉପରେ ନିହାତି ଭାବରେ ପ୍ରଭାବ ପଡିପାରେ ।
ପୂର୍ବରୁ ରିଲିଜ ହୋଇଥିବା ଫିଲ୍ମ ଉଁଚାଇରେ ସେ ନଜର ଆସିଥିଲେ । ବକ୍ସ ଅଫିସରେ ଅବଶ୍ୟ ସିନେମାଟି ଖାସ କମାଲ କରିପାରିନଥିଲା, ମାତ୍ର କ୍ରିଟିକ୍ସ, ଫ୍ୟାନ୍ସଙ୍କର ହୃଦୟ ଜିତିପାରିଥିଲା । ଅମିତାଭଙ୍କ ଅନେକ ଫିଲ୍ମ ଏବେ ପାଇପଲାଇନରେ ରହିଛି । ଯାହାମଧ୍ୟରେ ଗଣପତ୍, ଘୁମର, ଦ ଉମେଶ କ୍ରନିକାଲ୍ସ, ପ୍ରୋଜେକ୍ଟ କେ, ବଟରଫ୍ଲାଇ, ଖାକି 2 ଆଦି ସାମିଲ ରହିଛି । ମୋଟାମୋଟି ଭାବେ ବିଗ ବି 6ଟି ବଡ ପ୍ରୋଜେକ୍ଟରେ କାମ କରୁଛନ୍ତି । ତେବେ ଗଣପତ, ଘୁମର, ଦ ଉମେଶ କ୍ରନିକାଲସରେ ବିଗ ବି କେବଳ ସ୍ପେସିଆଲ ଆପିଅରାନ୍ସରେ ନଜର ଆସିବେ ।
ହେଲେ ପ୍ରୋଜେକ୍ଟ କେ ହେଉଛି ବଡ ବ୍ୟାନରର ବଡ ଫିଲ୍ମ । ଯେଉଁଥିରେ ତାଙ୍କ ସହ ପ୍ରଭାସ, ଦିପିକା ପାଦୁକୋନ, ଦିଶା ପାଟନୀ ନଜର ଆସିବେ । ପ୍ରୋଜେକ୍ଟ କେ ହେଉଛି ସାଇନ୍ସ ଫିକ୍ସନ ମୁଭି । ଯାହାକୁ ଡାଇରେକ୍ଟ କରୁଛନ୍ତି ନାଗ୍ ଅଶ୍ୱିନୀ । ଏହି ଫିଲ୍ମଟି ଉଭୟ ହିନ୍ଦୀ ଓ ତେଲୁଗୁରେ ରିଲିଜ ହେବ । ସେପଟେ ଏହି ଫିଲ୍ମରୁ ଦିପୀକା ପାଦୁକୋନ ତେଲୁଗୁ ଡେବ୍ୟୁ ମଧ୍ୟ କରୁଛନ୍ତି । ଏମିତିରେ ପୂର୍ବରୁ ବି କରୋନା ପାଇଁ ଏହି ଫିଲ୍ମଟି ବିଳମ୍ବ ହୋଇଥିଲା । 500 କୋଟି ବଜେଟରେ ନିର୍ମାଣ ହେଉଥିବା ଏହି ଫିଲ୍ମ ଭାରତର ସବୁଠୁ ମହଙ୍ଗା ଫିଲ୍ମ ବୋଲି କୁହାଯାଉଛି । ଯାହା 12 ଜାନୁୟାରୀ 2024ରେ ରିଲିଜ ହେବ ।
ସେପଟେ ଅମିତାଭଙ୍କ ଏଭଳି ଖବର ଶୁଣି ସେ ଜଲଦି ସୁସ୍ଥ ହେବାକୁ ଫ୍ୟାନ୍ସ ପ୍ରାର୍ଥନା କରୁଥିବା ବେଳେ ସୋସିଆଲ ମିଡିଆରେ ଅମିତାଭଙ୍କ ସ୍ପିଡ୍ ରିକଭରି ପାଇଁ ପୋଷ୍ଟ କରୁଛନ୍ତି ।
