ଭୁବନେଶ୍ୱର, ୨୯/୧୦: ବାତ୍ୟା ‘ଅର୍ଣ୍ଣବ’ର ପ୍ରଭାବ ନ କମୁଣୁ ବଙ୍ଗୋପସାଗରରେ ପୁଣି ଏକ ନୂଆ ପାଣିପାଗ ପ୍ରଣାଳୀ ସୃଷ୍ଟି ହେବାକୁ ଯାଉଛି। ଦକ୍ଷିଣ ଆଣ୍ଡାମାନ ସାଗର ଉପରେ ଏକ ଘୂର୍ଣ୍ଣିବଳୟ ସକ୍ରିୟ ରହିଛି। ଆସନ୍ତା ୨୪ ଘଣ୍ଟା ମଧ୍ୟରେ ଏହା ଲଘୁଚାପର ରୂପ ନେଇପାରେ ବୋଲି ଭାରତୀୟ ପାଣିପାଗ ବିଭାଗ (IMD) ଆକଳନ କରିଛି।
ଏହି ପୂର୍ବାନୁମାନ ଅନୁଯାୟୀ, ଗୁରୁବାର ସୁଦ୍ଧା ଦକ୍ଷିଣ ଆଣ୍ଡାମାନ ସାଗରରେ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି। ତେବେ ଏହି ପାଣିପାଗ ପ୍ରଣାଳୀ ପରବର୍ତ୍ତୀ ସମୟରେ ଅଧିକ ଘନୀଭୂତ ହେବ କି ନାହିଁ, ସେନେଇ ଆଇଏମଡି ପକ୍ଷରୁ ଏଯାଏଁ ସ୍ପଷ୍ଟ ଆକଳନ କରାଯାଇନାହିଁ।
ବାତ୍ୟା ନେଇ ବିଭିନ୍ନ ପାଣିପାଗ ମଡେଲର ଭିନ୍ନ ଆକଳନ
ସମ୍ଭାବ୍ୟ ଲଘୁଚାପକୁ ନେଇ ବିଭିନ୍ନ ଅନ୍ତର୍ଜାତୀୟ ପାଣିପାଗ ମଡେଲର ଆକଳନ ସାମ୍ନାକୁ ଆସିଛି। ଆମେରିକୀୟ ପାଣିପାଗ ମଡେଲ୍ GFSର ଆକଳନ ଅନୁଯାୟୀ, ଏହି ଲଘୁଚାପ ଧୀରେ ଧୀରେ ଘନୀଭୂତ ହୋଇ ବାତ୍ୟାର ରୂପ ନେଇପାରେ।
ଏହି ମଡେଲ୍ ଅନୁସାରେ, ନଭେମ୍ବର ୧ରୁ ୨ ତାରିଖ ମଧ୍ୟରେ ସମ୍ଭାବ୍ୟ ବାତ୍ୟା ଓଡ଼ିଶା ଓ ପଶ୍ଚିମବଙ୍ଗ ଉପକୂଳ ଆଡ଼କୁ ମୁହାଁଇପାରେ। ପରେ ଏହା ଉପକୂଳ ଅଞ୍ଚଳ ଦେଇ ବାଂଲାଦେଶ ଆଡ଼କୁ ଗତି କରିବାର ସମ୍ଭାବନା ଥିବା ମଡେଲ୍ ଆକଳନ କରିଛି।
ଏହି ସମ୍ଭାବ୍ୟ ପାଣିପାଗ ପ୍ରଣାଳୀର ଚାପ ଆହୁରି ହ୍ରାସ ପାଇପାରେ ବୋଲି GFS ମଡେଲ୍ ସୂଚାଉଛି। ତେବେ ଏହାର ତୀବ୍ରତା ଓ ଗତିପଥ ସମ୍ପର୍କରେ ଅଧିକ ସ୍ପଷ୍ଟତା ପାଇଁ ପରବର୍ତ୍ତୀ ଆକଳନକୁ ଅପେକ୍ଷା କରାଯାଇଛି।
ଆନ୍ଧ୍ର ଉପକୂଳ ଆଡ଼କୁ ଯାଇପାରେ: ECMWF
ଅନ୍ୟପକ୍ଷରେ, ୟୁରୋପୀୟ ପାଣିପାଗ ମଡେଲ୍ ECMWFର ଆକଳନ ଭିନ୍ନ ରହିଛି। ଏହି ମଡେଲ୍ ଅନୁଯାୟୀ, ସମ୍ଭାବ୍ୟ ଲଘୁଚାପ ଘନୀଭୂତ ହୋଇ ନଭେମ୍ବର ୨ ତାରିଖ ବେଳକୁ ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ଗତି କରିପାରେ।
ତେବେ ଦୁଇଟି ପାଣିପାଗ ମଡେଲର ଆକଳନ ମଧ୍ୟରେ ଗତିପଥକୁ ନେଇ ଭିନ୍ନତା ରହିଛି। ଏହି କାରଣରୁ ବର୍ତ୍ତମାନଠାରୁ ବାତ୍ୟା ସୃଷ୍ଟି ହେବା କିମ୍ବା ଏହା କେଉଁ ଉପକୂଳରେ ପ୍ରଭାବ ପକାଇବ, ସେନେଇ ନିଶ୍ଚିତ ଭାବେ କହିବା ସମ୍ଭବ ନୁହେଁ।
ବର୍ତ୍ତମାନ ସମସ୍ତଙ୍କ ନଜର ଦକ୍ଷିଣ ଆଣ୍ଡାମାନ ସାଗରରେ ସୃଷ୍ଟି ହେବାକୁ ଥିବା ଲଘୁଚାପ ଉପରେ ରହିଛି। ଏହାର ଗତିପଥ, ତୀବ୍ରତା ଓ ସମ୍ଭାବ୍ୟ ପ୍ରଭାବ ସମ୍ପର୍କରେ ଆଗାମୀ ପାଣିପାଗ ରିପୋର୍ଟରୁ ଅଧିକ ସୂଚନା ମିଳିପାରେ।
