ନୂଆଦିଲ୍ଲୀ, ୧୨/୦୯ : ଭୟଙ୍କର ଭୂକମ୍ପ ଝଟକାରେ ଥରିଛି ଇଣ୍ଡୋନେସିଆ। ଶନିବାର ଦେଶର ଜାଭା ଦ୍ୱୀପ ଅଞ୍ଚଳରେ ୬.୨ ତୀବ୍ରତାର ଭୂକମ୍ପ ଅନୁଭୂତ ହୋଇଛି। ଜର୍ମାନ ରିସର୍ଚ୍ଚ ସେଣ୍ଟର ଫର୍ ଜିୟୋସାଇନ୍ସ (ଜିଏଫ୍ଜେଡ୍)ର ତଥ୍ୟ ଅନୁସାରେ, ଭୂକମ୍ପର କେନ୍ଦ୍ରସ୍ଥଳ ଭୂପୃଷ୍ଠଠାରୁ ପ୍ରାୟ ୩୭୬ କିଲୋମିଟର ଗଭୀରରେ ଥିଲା।
ବର୍ତ୍ତମାନ ସୁଦ୍ଧା ଭୂକମ୍ପ ଯୋଗୁଁ କୌଣସି ମୃତାହତ ଖବର ମିଳିନାହିଁ। ତେବେ କେତେକ ସ୍ଥାନରେ ଘରର କାନ୍ଥରେ ଫାଟ ସୃଷ୍ଟି ହୋଇଥିବା ଜଣାପଡ଼ିଛି। ବିଳମ୍ବିତ ରାତିରେ ଭୂକମ୍ପ ହୋଇଥିବାରୁ ଅନେକ ଲୋକ ନିଦରୁ ଉଠି ଭୟଭୀତ ହୋଇ ଘର ବାହାରକୁ ଚାଲି ଆସିଥିଲେ।
ଭୂକମ୍ପ ପରେ ସ୍ଥାନୀୟ ପ୍ରଶାସନ ପକ୍ଷରୁ ପରିସ୍ଥିତି ଉପରେ ନଜର ରଖାଯାଇଛି। ଏପର୍ଯ୍ୟନ୍ତ ସୁନାମି ସମ୍ପର୍କିତ କୌଣସି ଆଲର୍ଟ ଜାରି ହୋଇନାହିଁ। ତଥାପି ସମ୍ଭାବ୍ୟ ବିପଦକୁ ଦୃଷ୍ଟିରେ ରଖି ସ୍ଥାନୀୟ ଏଜେନ୍ସିଗୁଡ଼ିକୁ ସତର୍କ ରହିବାକୁ ସରକାର ନିର୍ଦ୍ଦେଶ ଦେଇଛନ୍ତି।
ସୂଚନାଯୋଗ୍ୟ, ଏହା ପୂର୍ବରୁ ଶୁକ୍ରବାର ମଧ୍ୟ ଇଣ୍ଡୋନେସିଆର ବାନ୍ଦା ସାଗର ଏବଂ ମାଲୁକୁ ଦ୍ୱୀପ ଅଞ୍ଚଳରେ ଭୂକମ୍ପ ଝଟକା ଅନୁଭୂତ ହୋଇଥିଲା। କ୍ରମାଗତ ଭୂକମ୍ପ ଯୋଗୁଁ ସ୍ଥାନୀୟ ଲୋକଙ୍କ ମଧ୍ୟରେ ଚିନ୍ତା ବଢ଼ିଛି।
