ନୂଆଦିଲ୍ଲୀ : ଆର୍ଜେଣ୍ଟିନାର ମହାନ ଫୁଟବଲ ତାରକା ଲିଓନେଲ ମେସିଙ୍କ ଜୀବନରେ ନେଇଆସିଛି ଏକ ଦୁଃଖଦ ଅଧ୍ୟାୟ। ଦୀର୍ଘଦିନ ଧରି ଅସୁସ୍ଥ ଥିବା ତାଙ୍କ ପିତା ଜର୍ଜ ମେସିଙ୍କ ୬୮ ବର୍ଷ ବୟସରେ ରୋସାରିଓର ଏକ କ୍ଲିନିକରେ ଦେହାନ୍ତ ହୋଇଛି। ପିତାଙ୍କ ମୃତ୍ୟୁରେ ଭାଙ୍ଗିପଡ଼ିଥିବା ମେସି ଏହି ଦୁଃଖଦ ସମୟରେ ପରିବାରକୁ ସମୟ ଦେବା ପାଇଁ ଫୁଟବଲରୁ ଅନିର୍ଦ୍ଦିଷ୍ଟକାଳ ପାଇଁ ଦୂରେଇ ରହିବାର ନିଷ୍ପତ୍ତି ନେଇଥିବା କୁହାଯାଉଛି। ତାଙ୍କ ଇଣ୍ଟର ମିଆମିକୁ ପ୍ରତ୍ୟାବର୍ତ୍ତନ ନେଇ ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିନାହିଁ।
ମେସିଙ୍କ ଫୁଟବଲ ଯାତ୍ରାରେ ଜର୍ଜ ମେସିଙ୍କ ଅବଦାନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କେବଳ ପିତା ଭାବେ ନୁହେଁ, ବରଂ ପୁଅର କ୍ୟାରିୟର ଗଢ଼ିବାରେ ସେ ଜଣେ ମାର୍ଗଦର୍ଶକ ଓ ପରାମର୍ଶଦାତା ଭାବେ ମଧ୍ୟ ଭୂମିକା ନେଇଥିଲେ। ପ୍ରାରମ୍ଭିକ ଜୀବନରେ ଏକ ଇସ୍ପାତ କାରଖାନାରେ ସୁପରଭାଇଜର ଭାବେ କାମ କରୁଥିବା ଜର୍ଜ ପରେ ମେସିଙ୍କ ମ୍ୟାନେଜର ଭାବେ ମଧ୍ୟ ତାଙ୍କ କ୍ୟାରିୟରରେ ସହଯୋଗ କରିଥିଲେ।
ମେସିଙ୍କ ଫୁଟବଲ ଯାତ୍ରା ନ୍ୟୁଏଲ୍ସ ଓଲ୍ଡ ବଏଜ୍ରୁ ଆରମ୍ଭ ହୋଇଥିଲା। ମାତ୍ର ୧୩ ବର୍ଷ ବୟସରେ ବାର୍ସେଲୋନାର ୟୁଥ୍ ଏକାଡେମୀରେ ଯୋଗଦେବା ପାଇଁ ସ୍ପେନ୍ ଯିବାରେ ମଧ୍ୟ ଜର୍ଜ ତାଙ୍କୁ ସହଯୋଗ କରିଥିଲେ। ସେତେବେଳେ ମେସି ଗ୍ରୋଥ୍ ହରମୋନ୍ ଅଭାବଜନିତ ସମସ୍ୟାର ସମ୍ମୁଖୀନ ହେଉଥିଲେ। ବାର୍ସେଲୋନା ତାଙ୍କ ଚିକିତ୍ସା ଖର୍ଚ୍ଚ ବହନ କରିବାରୁ ମେସି ଆବଶ୍ୟକ ଚିକିତ୍ସା ପାଇପାରିଥିଲେ।
ଜର୍ଜ ମେସିଙ୍କ ପରିବାରରେ ତାଙ୍କ ପତ୍ନୀ ସେଲିଆ କୁଚିଟିନିଙ୍କ ସହ ଚାରି ସନ୍ତାନ—ଲିଓନେଲ, ରୋଡ୍ରିଗୋ, ମାଟିଆସ ଓ ମାରିଆ ସୋଲ୍ ଅଛନ୍ତି।
ପିତାଙ୍କ ବିୟୋଗ ମେସିଙ୍କ ପାଇଁ ନିଶ୍ଚିତ ଭାବେ ଏକ ବଡ଼ ବ୍ୟକ୍ତିଗତ କ୍ଷତି। ଏହି ଦୁଃଖଦ ସମୟରେ ଫୁଟବଲଠାରୁ ପରିବାରକୁ ଅଧିକ ଗୁରୁତ୍ୱ ଦେଇ ମେସି ନିଜ ପରିବାର ସହ କିଛି ସମୟ ବିତାଇବାକୁ ଚାହୁଁଛନ୍ତି।
ଫୁଟବଲରୁ ବ୍ରେକ ନେଲେ ମେସି ! ଆଉ ଖେଳିବେନି କି ମ୍ୟାଚ୍?
