ଲକ୍ଷ୍ନୌ: ଉତ୍ତରପ୍ରଦେଶର ଜେବରସ୍ଥିତ ନୋଏଡା ଇଣ୍ଟରନ୍ୟାସନାଲ ଏୟାରପୋର୍ଟର ନାମକରଣକୁ ନେଇ ବଡ଼ ପଦକ୍ଷେପ ନେଇଛନ୍ତି ଯୋଗୀ ସରକାର। ଗୌତମବୁଦ୍ଧ ନଗର ଜିଲ୍ଲାର ଗ୍ରେଟର ନୋଏଡା ନିକଟରେ ନିର୍ମାଣାଧୀନ ଏହି ବିମାନବନ୍ଦରର ନାମ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନାମରେ ରଖିବାକୁ ରାଜ୍ୟ କ୍ୟାବିନେଟ୍ରେ ପ୍ରସ୍ତାବ ମଞ୍ଜୁର ହୋଇଥିବା ନେଇ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସୂଚନା ଦେଇଛନ୍ତି।
ପ୍ରସ୍ତାବ ଅନୁଯାୟୀ, ଏହି ବିମାନବନ୍ଦରର ନାମ ‘ନରେନ୍ଦ୍ର ମୋଦି ଇଣ୍ଟରନ୍ୟାସନାଲ ଏୟାରପୋର୍ଟ’ ରଖିବାକୁ ଯୋଜନା ରହିଛି। ଏଥିପାଇଁ ଉତ୍ତରପ୍ରଦେଶ ସରକାର ଆବଶ୍ୟକ ପ୍ରକ୍ରିୟା ଆଗକୁ ବଢ଼ାଇବାକୁ ପଦକ୍ଷେପ ନେଇଛନ୍ତି।
କ୍ୟାବିନେଟ୍ରେ ୩୯ଟି ପ୍ରସ୍ତାବକୁ ମଞ୍ଜୁରୀ
ଲକ୍ଷ୍ନୌରେ ଅନୁଷ୍ଠିତ କ୍ୟାବିନେଟ୍ ବୈଠକ ପରେ ସାମ୍ବାଦିକ ସମ୍ମିଳନୀରେ ଯୋଗୀ ଆଦିତ୍ୟନାଥ ଏହି ସୂଚନା ଦେଇଥିଲେ। ବୈଠକରେ ମୋଟ ୩୯ଟି ପ୍ରସ୍ତାବ ଉପରେ ମୋହର ଲାଗିଥିବା ସେ କହିଛନ୍ତି। ଏଥିମଧ୍ୟରେ ଜେବର ଏୟାରପୋର୍ଟର ନାମକରଣ ପ୍ରସ୍ତାବ ମଧ୍ୟ ସାମିଲ ରହିଛି।
ଯୋଗୀଙ୍କ କହିବା ଅନୁଯାୟୀ, ପ୍ରଧାନମନ୍ତ୍ରୀ ମୋଦିଙ୍କ ନେତୃତ୍ୱ ଓ ଦୂରଦର୍ଶିତା ଉତ୍ତରପ୍ରଦେଶର ବିକାଶକୁ ନୂଆ ଦିଗ ଦେଇଛି। ରାଜ୍ୟରେ ଭିତ୍ତିଭୂମିର ବିକାଶ ସହ ଯୋଗାଯୋଗ ବ୍ୟବସ୍ଥାକୁ ମଜବୁତ କରିବା ଉପରେ ସରକାର ଗୁରୁତ୍ୱ ଦେଇଆସୁଛନ୍ତି।
ମୋଦିଙ୍କ ଜନସେବାର ୨୫ ବର୍ଷ ପୂର୍ତ୍ତିକୁ ପ୍ରଶଂସା
ସାମ୍ବାଦିକ ସମ୍ମିଳନୀରେ ଯୋଗୀ ଆଦିତ୍ୟନାଥ କହିଛନ୍ତି ଯେ ଜନସେବା କ୍ଷେତ୍ରରେ ନରେନ୍ଦ୍ର ମୋଦିଙ୍କ ୨୫ ବର୍ଷ ପୂର୍ତ୍ତି ଅବସରରେ ଉତ୍ତରପ୍ରଦେଶ କ୍ୟାବିନେଟ୍ ତାଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଇଛି।
ସେ ଆହୁରି କହିଛନ୍ତି ଯେ ମୋଦିଙ୍କ ନେତୃତ୍ୱରୁ ପ୍ରେରଣା ନେଇ ଉତ୍ତରପ୍ରଦେଶ ସରକାର ଶାସନ ବ୍ୟବସ୍ଥାରେ ନୂଆ କାର୍ଯ୍ୟ ସଂସ୍କୃତି ଆପଣାଇଛନ୍ତି। ରାଜ୍ୟରେ ବିକାଶମୂଳକ କାର୍ଯ୍ୟକୁ ଆଗକୁ ନେବା ସହ ଲୋକଙ୍କ ମଧ୍ୟରେ ଆତ୍ମବିଶ୍ୱାସ ବଢ଼ିଥିବା ସେ ଦାବି କରିଛନ୍ତି।
୨୦୧୭ ପୂର୍ବର ସ୍ଥିତିକୁ ନେଇ ବିରୋଧୀଙ୍କୁ ଟାର୍ଗେଟ୍
ଏହି ଅବସରରେ ଯୋଗୀ ବିରୋଧୀ ଦଳଗୁଡ଼ିକୁ ମଧ୍ୟ ଟାର୍ଗେଟ୍ କରିଥିଲେ। ୨୦୧୭ ପୂର୍ବରୁ ଉତ୍ତରପ୍ରଦେଶରେ ପ୍ରଶାସନିକ ଅସ୍ଥିରତା ରହିଥିବା ସହ ସାଧାରଣ ଲୋକେ ନିଜକୁ ଅସୁରକ୍ଷିତ ମଣୁଥିଲେ ବୋଲି ସେ କହିଥିଲେ।
ତାଙ୍କ ମତରେ, ମୋଦିଙ୍କ ଦୂରଦର୍ଶିତାରୁ ପ୍ରେରଣା ନେଇ ଉତ୍ତରପ୍ରଦେଶ ଶାସନ ବ୍ୟବସ୍ଥାରେ ପରିବର୍ତ୍ତନ ଆଣିଛି। ବର୍ତ୍ତମାନ ରାଜ୍ୟ ବିକାଶର ବିଭିନ୍ନ କ୍ଷେତ୍ରରେ ନୂଆ ଉଦାହରଣ ସୃଷ୍ଟି କରୁଥିବା ସେ ଦାବି କରିଛନ୍ତି।
ତେବେ ଜେବର ଏୟାରପୋର୍ଟର ନାମ ପରିବର୍ତ୍ତନ ପ୍ରସ୍ତାବ ଉପରେ ଆଗାମୀ ଦିନରେ ହେବାକୁ ଥିବା ଔପଚାରିକ ପ୍ରକ୍ରିୟା ଉପରେ ଏବେ ନଜର ରହିଛି।
