ନୂଆଦିଲ୍ଲୀ, ୮/୧୧ : ଭାରତ-ନ୍ୟୁଜିଲାଣ୍ଡ ଦ୍ୱିତୀୟ ଦିନିକିଆରେ ରୋମାଞ୍ଚକର ବିଜୟ ହାସଲ କରିଛି ଟିମ୍ ଇଣ୍ଡିଆ । କମ୍ ରନ୍ର ମୁକାବିଲାରେ ଭାରତ ହାରୁ ହାରୁ ଜିତିଥିବା ବେଳେ ମ୍ୟାଚ୍ର ଏକ ଘଟଣାକୁ ନେଇ ଏବେ ଚର୍ଚ୍ଚା ଜୋର୍ ଧରିଛି । ଜଣେ ଫ୍ୟାନ୍ଙ୍କ ଆଚରଣରେ ରାଗିଯାଇଥିଲେ ଷ୍ଟାର୍ ବ୍ୟାଟର ବିରାଟ କୋହଲି । ଏପରିକି ନିଜେ ଫ୍ୟାନ୍ଙ୍କ ଫିଙ୍ଗିଥିବା ପ୍ଲାଷ୍ଟିକ୍ ବ୍ୟାଟ୍ ଉଠାଇ ବାଉଣ୍ଡରୀ ଆରପଟକୁ ଫିଙ୍ଗି ଦେଇଥିଲେ ।
ରିପୋର୍ଟ ଅନୁସାରେ, ଭାରତୀୟ ଦଳର ବୋଲିଂ ସମୟରେ ବାଉଣ୍ଡରୀ ଲାଇନ୍ ନିକଟରେ ଫିଲ୍ଡିଂ କରୁଥିଲେ ବିରାଟ । ଏହି ସମୟରେ ଜଣେ ଫ୍ୟାନ୍ ତାଙ୍କ ଉପରକୁ ଏକ ଛୋଟ ପ୍ଲାଷ୍ଟିକ୍ ବ୍ୟାଟ୍ ଫିଙ୍ଗିଥିଲେ । ବିରାଟଙ୍କଠାରୁ ଅଟୋଗ୍ରାଫ୍ ପାଇବା ଆଶାରେ ଫ୍ୟାନ୍ ଜଣକ ଏପରି କରିଥିବା ଜଣାପଡ଼ିଛି ।
କିନ୍ତୁ ଫ୍ୟାନ୍ଙ୍କ ଏଭଳି ଆଚରଣରେ ଅସନ୍ତୋଷ ପ୍ରକାଶ କରିଥିଲେ କୋହଲି । ଏହାପରେ ସେ ନିଜେ ବ୍ୟାଟ୍ଟିକୁ ଉଠାଇ ବାଉଣ୍ଡରୀ ଆରପଟକୁ ଫିଙ୍ଗି ଦେଇଥିଲେ । ବ୍ୟାଟ୍ ଉଠାଇବା ସମୟରେ ବିରାଟଙ୍କ ମୁହଁରେ ରାଗ ଓ ଅସନ୍ତୋଷ ସ୍ପଷ୍ଟ ବାରି ହୋଇପଡ଼ୁଥିଲା । ମ୍ୟାଚ୍ ସମୟର ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି ।
୭ ୱିକେଟ୍ ହରାଇ ଜିତିଲା ଭାରତ
ମ୍ୟାଚ୍କୁ ଦେଖିଲେ ନ୍ୟୁଜିଲାଣ୍ଡ ୧୩୪ ରନ୍ରେ ଅଲ୍ଆଉଟ୍ ହେବା ପରେ ଭାରତ ସହଜରେ ବିଜୟ ହାସଲ କରିବ ବୋଲି ଲାଗୁଥିଲା । କିନ୍ତୁ ନ୍ୟୁଜିଲାଣ୍ଡର ଦ୍ରୁତ ବୋଲରମାନେ ପିଚ୍ରୁ ମିଳୁଥିବା ସହାୟତାର ଫାଇଦା ଉଠାଇ ଭାରତୀୟ ବ୍ୟାଟରଙ୍କୁ ଅଡ଼ୁଆରେ ପକାଇଥିଲେ ।
ଭାରତର ବ୍ୟାଟିଂ ବିପର୍ଯ୍ୟୟ ଆରମ୍ଭ ହୋଇଥିଲା ଅଧିନାୟକ ଶୁଭମନ ଗିଲଙ୍କ ଆଉଟ୍ରୁ । ଜାକବ ଡଫି ତାଙ୍କୁ ଖାତା ଖୋଲିବାକୁ ମଧ୍ୟ ସୁଯୋଗ ଦେଇନଥିଲେ । ଏହାପରେ ଇନ୍ଫର୍ମ ବ୍ୟାଟର ବିରାଟ କୋହଲି ମାତ୍ର ୭ ରନ୍ କରି ଆଉଟ୍ ହେବା ଭାରତକୁ ବଡ଼ ଝଟକା ଦେଇଥିଲା ।
ଅନ୍ୟପଟେ ରୋହିତ ଶର୍ମା କ୍ରିଜ୍ରେ ଜମିବାକୁ ଚେଷ୍ଟା କରିଥିଲେ । କିନ୍ତୁ ସେ ୨୩ ରନ୍ କରି ଆଉଟ୍ ହେବା ପରେ ଭାରତର ଅଡ଼ୁଆ ଆହୁରି ବଢ଼ିଥିଲା । ଉପରକ୍ରମରେ ବ୍ୟାଟିଂ କରିବାକୁ ଆସିଥିବା ଅକ୍ଷର ପଟେଲ ମଧ୍ୟ ୭ ରନ୍ କରି ଆଉଟ୍ ହୋଇଥିଲେ ।
ବର୍ଷା ଆଣିଲା ବିଜୟ
ନ୍ୟୁଜିଲାଣ୍ଡର କମ୍ ସ୍କୋର ସତ୍ତ୍ୱେ ଭାରତୀୟ ଦଳ ୭ଟି ୱିକେଟ୍ ହରାଇ ସାରିଥିଲା । ଏହି ସମୟରେ ବର୍ଷା ହେବାରୁ ମ୍ୟାଚ୍ର ଗତି ବଦଳିଯାଇଥିଲା । ଶେଷରେ ଡିଏଲ୍ଏସ୍ ମେଥଡ୍ରେ ଭାରତ ୪ ରନ୍ରେ ବିଜୟୀ ହୋଇଥିଲା ।
