ନୂଆଦିଲ୍ଲୀ: ଅନ୍ତର୍ଜାତୀୟ ଫୁଟବଲ୍କୁ ଅଲ୍ବିଦା କହିଲେ କିମ୍ବଦନ୍ତୀ ଫୁଟବଲ୍ ତାରକା କ୍ରିଷ୍ଟିଆନୋ ରୋନାଲ୍ଡୋ। ଦୀର୍ଘ ୨୩ ବର୍ଷର ଗୌରବମୟ ଯାତ୍ରାରେ ପୂର୍ଣ୍ଣଚ୍ଛେଦ ଟାଣିବାକୁ ନିଷ୍ପତ୍ତି ନେଇଛନ୍ତି ଏହି ମହାନ ଖେଳାଳି। ଗୁରୁବାର ସୋସିଆଲ୍ ମିଡିଆରେ ଏକ ଭାବବିହ୍ୱଳ ଭିଡିଓ ଜାରି କରି ସେ ନିଜ ଅବସର ସମ୍ପର୍କରେ ଘୋଷଣା କରିଛନ୍ତି। ରୋନାଲ୍ଡୋଙ୍କ ଏହି ନିଷ୍ପତ୍ତି ଫୁଟବଲ୍ ଜଗତରେ ଚର୍ଚ୍ଚା ସୃଷ୍ଟି କରିଛି।
ପର୍ତ୍ତୁଗାଲ୍ ପାଇଁ ଖେଳି ରୋନାଲ୍ଡୋ ଅନେକ ଐତିହାସିକ ସଫଳତା ହାସଲ କରିଛନ୍ତି। ନିଜ କ୍ୟାରିୟରରେ ସେ ଜାତୀୟ ଦଳ ପକ୍ଷରୁ ୨୩୪ଟି ମ୍ୟାଚ୍ ଖେଳି ୧୪୬ଟି ଗୋଲ୍ ସ୍କୋର କରିଛନ୍ତି। ଦୁଇ ଦଶନ୍ଧିରୁ ଅଧିକ ସମୟ ଧରି ତାଙ୍କ ଚମତ୍କାର ପ୍ରଦର୍ଶନ ବିଶ୍ୱର କୋଟି କୋଟି ଫୁଟବଲ୍ ପ୍ରେମୀଙ୍କୁ ମନ୍ତ୍ରମୁଗ୍ଧ କରିଥିଲା।
ସୂଚନା ଅନୁସାରେ, ନେସନ୍ସ ଲିଗ୍ରେ ଖେଳିବାକୁ ସୁଯୋଗ ନମିଳିବା ପରେ ଜାତୀୟ ଦଳର କୋଚ୍ ଜର୍ଜ ଜେସସ୍ଙ୍କ ସହ ତାଙ୍କର ମତଭେଦ ଦେଖାଦେଇଥିଲା। ଏହାକୁ ନେଇ ସେ ଅସନ୍ତୋଷ ପ୍ରକାଶ କରିଥିବା ଖବର ଆସିଥିଲା। ଏବେ ଅନ୍ତର୍ଜାତୀୟ ଫୁଟବଲ୍ରୁ ତାଙ୍କ ଅବସର ଘୋଷଣା ପ୍ରଶଂସକଙ୍କୁ ନିରାଶ କରିଛି।
ନିଜ ବିଦାୟୀ ବାର୍ତ୍ତାରେ ରୋନାଲ୍ଡୋ କହିଛନ୍ତି, ପର୍ତ୍ତୁଗାଲ୍ବାସୀଙ୍କ ପାଇଁ ଏବେ ସେହି ମୁହୂର୍ତ୍ତ ଆସିଛି, ଯେତେବେଳେ ସେ ଜାତୀୟ ଦଳର ୭ ନମ୍ବର ଜର୍ସିକୁ ଫେରାଇ ଦେଉଛନ୍ତି। ଏହି ଜର୍ସି କେବଳ ତାଙ୍କର ନଥିଲା ବୋଲି ସେ କହିବା ସହ ଗତ ୨୩ ବର୍ଷ ଧରି ଏହାକୁ ପିନ୍ଧି ଦେଶର ପ୍ରତିନିଧିତ୍ୱ କରିବା ତାଙ୍କ ପାଇଁ ଗର୍ବ ଓ ସୌଭାଗ୍ୟର ବିଷୟ ଥିଲା ବୋଲି ଭାବବିହ୍ୱଳ ହୋଇ ପ୍ରକାଶ କରିଛନ୍ତି।
